Kur jam çky e jam ç’nderue n’sy të babës, të fëmijëve

Tokën me thojë e kam grry e dhambët fort i kam shtrengue

Qi mos me qit as edhe nji za

Kamba duersh kam grry e grry me krejt hezin tem të mbetun

Vedit varrin me ja ba

Dhimtën tem e paçi n’qafë!

Kur juve ju asht dhanë liria mue më asht marrë

Marrja m’ka shtye me heshtë e heshtja betonue shpirtin ma ka

Kur juve ju asht dhanë shpresa mue më asht marrë

Dielli më asht nxi, fryma më asht nxanë edhe hijen tem urry e kam

Dekën veç e kam andrru e shpirtin e kam lut me dal

Ngujimin tem e paçi n’qafë!

Kur kam dasht me b’za e me kafshu edhe unë nji copë lirie

Prej rrënojave t’mia ngritët mure rreth e rreth

Po humnera jem asht ma e thellë se muret tueja

Hiçi jem asht ma i madh se lavdia juej

Rrënqethja jem asht ma e zhurmshme se vaji juej

Unë jam vra ma shumë se nji herë

E ju?

Heshtjen tem e paçi n’qafë!

Kushtuar grave të dhunuara gjatë luftës në Kosovë